ژونده

 کله د ګل په شانې ناز راکوې

 کله مې خاوره د قدم جوړوې 

 ستا دوه مخونه عجیبه، ژوندونه

نه خو دی یار او نه اغیاره کړمه

 هسې یو بل سره شیبې تیروو

رڼا.م

 

ستا خیال

 

لکه ګل چې شبنم غواړي
هومره زړه غواړي، نن تا
خو شبنم ؟
شبنم خپله وڅڅیږې د ګل غیږ کې
او زما په غیږ کې زانګي ستا خیالونه
هغه خیال چې ریښتیا نه شو
نن مې تشه زما غیږ ده
هسې نوم دی د جانان
زنګوم په کې هجران

رڼآ.م

ته چې زما په ژبه نه پوهیږې

چیرته به پوه شې د بل چا په ژبه

ته چې زما د زړه آذان نه اورئ

خدای که به پوه شې د الله په ژبه

رڼا.م

 

څومره بې وفا د ژوند شیبې شولې
ته چې راغلې، مانه هغوې لاړلې

Rana.M 

منزل

د زړه په کور دننه وار په وار ما کړوي
هر دم قدم ېې ګورمه چې ما ناراموي

جذبه د هر نظر دې دومره ګرانه په ما پايي
چې هر نفس د زړه مې هم له ځانه هیروي

دا هغه چې اشنا بولم په یو نظر دننه
د زړه هره مرغه راته په ناز حلالوي

زه پرخه د یاغې اسمان په لور، په الوتلو
منزل د ارمانومې چې په هرې لوري وړي
رڼا.م

مونږ په غمونو …

مونږ په غمونو کې لوې شوي په غمو کې به مرو
دا مو اذل کې لیکل شوي چې افغان پاتې شو
رڼا.م

دا ولې؟

موسم د پسرلو دې،خو وطن کې مې تر اوسه

مرغه د ارمانونو د خزان له لاسه ژاړي
یو درد مو ټکور شوې نه وي بل راته پیدا شي
د ژوند هره ګړې مو د انسان له لاسه ژاړي
رڼا.م

 

ستا د ظلم ناروا…

ستا د ظلم ناروا نه به څه وایم
تش کاته دی زما زړه اره کوي
ستا د مینې کاسه ډکه ده له حرصه
دم په دم مې د زړه وینه خلاصوي
رڼا.م

زما په څير

زمونږ د کلي لښتي
زمونږ د بڼ ګلونه
زمونږ زړه اسویلې
زمونږ دمینې وینه
زمونږ د غره نښترئ
زمونږ ګریوان د هیلو
زمونږ د باغ ښاپيرې
زمونږ…؟
هغه او دغه
زمونږ د ژوند خاطرې
ټولې جګړې وخوړئ
او رانه پټې ېې کړې

زمونږ د زړه هدیرې
زمونږ ارمان رپوي
او د وطن ادکه
بیا په ښیرو ناسته ده
جګړه ده توره بلا
زما ېې کور ویجاړه کړ
خدایه زما په څير ېې
ته په ژړا ستړې کړه ته
دوطن مور مې ویل.

خدایه دعا مې دا ده
د وطن مور مې ویل

رڼآ.م

کله چې ګل وو ن…

کله چې ګل وو نو مالیار مو نه وو
نن چې مالیار شته زمونږ بڼ ورژید
دا هم زمونږ د نصیب خپل نصیب شو
رڼا.م